सांगोला पोलीस स्टेशन व अजनाळे ग्रामपंचायतीच्या संयुक्त उपक्रमांतर्गत वृक्षलागवड मोहिमेस उत्स्फूर्त प्रतिसाद
अजनाळे :
सकाळी ११ वाजता सुरू झालेल्या या उपक्रमाचे उद्घाटन सांगोला पोलीस स्टेशनचे कर्तव्यदक्ष पोलीस निरीक्षक मा. विनोद घुगे आणि अजनाळे ग्रामपंचायतीच्या आदरणीय सरपंच सौ. अनिता पवार मॅडम यांच्या हस्ते करण्यात आले. शाळेच्या आवारात सुमारे ३० ते ३५ वृक्षांचे रोपण करण्यात आले. यामध्ये चिंच, वड, निंब, पिंपळ, करंज अशा भारतीय पर्यावरणासाठी उपयुक्त आणि आरोग्यदायी वृक्षांचा समावेश होता.
या कार्यक्रमाला गावातील अनेक प्रतिष्ठित नागरिक, ग्रामपंचायत सदस्य, ग्रामसेवक, शाळेचे शिक्षक व शिक्षकेतर कर्मचारी, विद्यार्थी, तसेच युवक नेते चंद्रकांत पवार यांची विशेष उपस्थिती होती. उपस्थितांनी वृक्षलागवडीस हातभार लावला आणि परिसर स्वच्छ व सुंदर ठेवण्याच्या दृष्टिकोनातून उत्साहाने सहभाग घेतला.
यावेळी पोलीस निरीक्षक मा. विनोद घुगे यांनी वृक्षलागवडीचे पर्यावरणीय व सामाजिक महत्त्व अधोरेखित करत सांगितले की, "वाढत्या तापमानाला आळा घालण्यासाठी आणि भविष्यातील पिढ्यांना निरोगी पर्यावरण देण्यासाठी आजपासून आपण वृक्षसंवर्धनाची जबाबदारी स्वीकारली पाहिजे. ही फक्त एक सुरुवात आहे; पुढील काळात अजून मोठ्या प्रमाणात वृक्षलागवडीचे नियोजन करण्यात येणार आहे."
सरपंच सौ. अनिता पवार मॅडम यांनी सांगितले की, "गावात अधिकाधिक हिरवळ निर्माण करणे हे आपले सामूहिक कर्तव्य आहे. ग्रामपंचायत यामध्ये सक्रिय भूमिका बजावेल आणि गावकऱ्यांनीदेखील यामध्ये पुढाकार घ्यावा."
या उपक्रमामुळे परिसरात हरित क्रांतीस चालना मिळेल आणि लोकांमध्ये पर्यावरणविषयक जागरूकतेचा प्रसार होईल, असा विश्वास ग्रामस्थांनी व्यक्त केला. गावातच नव्हे, तर संपूर्ण तालुक्यात हा उपक्रम आदर्शवत ठरावा, अशी अपेक्षा यावेळी व्यक्त करण्यात आली.
कार्यक्रमाची सांगता वृक्षसंवर्धनाच्या संकल्पाने झाली. शाळेतील विद्यार्थ्यांनी देखील या उपक्रमात सक्रिय सहभाग घेत, "एक विद्यार्थी – एक वृक्ष" हे ब्रीद मनात ठेऊन प्रत्येकाने झाडे लावण्याची तयारी दर्शवली.
हा उपक्रम पर्यावरण रक्षणाच्या दिशेने एक सकारात्मक पाऊल ठरला असून, अशा प्रकारचे उपक्रम सातत्याने राबविण्याची आवश्यकता असल्याचे सर्वांनी मान्य केले.
कोणत्याही टिप्पण्‍या नाहीत